歪斯波㗎?我食鹽多過您食米呀!

「我有好多壞習慣,最壞嘅,係愛上咗您。」MOS BURGER嘅米漢堡相信大家未食過都一定聽過,連平時唔係太食BURGER嘅筆者娘親都對佢嘅金平牛蒡米漢堡讚口不絕。但大家又知唔知早係九十年代尾,正值97金融風暴之際,大快活早就已經出過RiceBurger?當年仲搵咗仲係好青澀嘅Chef Le Mon同埋金城武拍CM。但筆者就覺得大快活當年真係行得好前!一間老正嘅港式快餐店竟然係90年代,大家都仲未好接受FUSION菜嘅時間,推出如此產物,不得不讚賞佢哋嘅勇氣。(雖然呢個Product當年唔係好賣得,好似出咗一年都無就已經摺埋。)

到到2000年代中,麥當勞都出過兩三次「飯Tastic」系列嘅Product。因為個包極為難食筆者都唔係度詳談喇。

米漢堡,故名思義就係將兩片由米飯整成嘅「包皮」,夾住唔同嘅餡料同醬汁而成。米飯皮要做得實淨,不然一咬就成個包散晒。醬汁方面,筆者就傾向比較濃稠一啲嘅,會同比普通漢堡包乾身嘅米漢堡夾啲。餡料同配菜方面就可以好隨心,揀番您哋鍾意嘅就Okay。(但筆者覺得RiceBurger同漢堡扒真心唔夾,如果想食漢堡扒嘅話建議食番普通Burger。)

薑燒豚肉米漢堡[4個份量]:

米漢堡:

  • 珍珠米———640克(為煮熟後重量,每片大約80克)
  • 鹽—————1/2茶匙
  • 日式醬油——1茶匙
  • 牛油————少許
  • 飯素————1湯匙(個人喜好)

醬汁餡料:

  • 味醂————40毫升
  • 料理酒———40毫升
  • 日式醬油——40毫升
  • 薑蓉————1湯匙
  • 糖—————1.5湯匙
  • 豚肉片———200克(切開,每片約長5厘米)
  • 洋蔥————1/2個(切絲,約0.5厘米厚)

其他材料:

  • 生菜————適量(切去比較硬的莖部,只留葉子會比較容易組裝)
  • 芝麻————少許
  • 日式沙律醬—適量

步驟:

  1. 珍珠米以電飯煲煮熟,蓋好放於室溫中冷卻備用。
  2. 將醬汁部份材料混合,加入切好嘅豚肉片醃10-15分鐘。
  3. 洋蔥切絲,放入水中備用。
  4. 珍珠米加入日式醬油同鹽撈混。(為咗令視覺上再靚少少同埋將米漢堡嘅味道再添多個層次,我今次加咗紫蘇飯素。)
  5. 取出約80克的珍珠米,用保鮮紙包好,壓成一塊約1厘米厚嘅米漢堡。(如果想做得靚仔啲可以用牛奶盒剪出一個1厘米厚嘅圓形環,或者去烘焙鋪買一個差唔多大少嘅圓形模。)
  6. 平底鑊細火塗平均上少許牛油,將米漢堡烤至乾身及微微金黃色。取出備用。
  7. 將洋蔥下鑊炒至半熟,加入醃好的豚肉片,煮至醬汁濃稠,就可以盛起,開始組裝。
  8. 米漢堡放底,鋪上生菜,加入醬汁豚肉,灑上芝麻同日式沙律醬,再將頂層米漢堡蓋上。

小貼士:

  1. 米漢堡盡可能壓得實一啲平均啲,如果唔係烤果時會好易散開。
  2. 可將日式沙律醬唧係保鮮紙上面包好,再用牙簽拮一個小窿,就可以唧到平時食大板燒幼幼嘅沙律醬。
  3. 如果米漢堡整左食唔晒,可以用保鮮紙包好放入食物盒中,上面再加一塊濕咗水嘅萬用紙,蓋好放入雪櫃,可最多保存2日而不令米漢堡水份被完全抽乾。

上面分享嘅只係筆者比較常做嘅米漢堡,RiceBurger餡料都可以好多變,大家可以依照個人口味隨便配搭。同埋組裝食物不嬲都十分好玩,絕對可以成為情侶、親子、好友聚會嘅周末玩意!

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s