「裝逼」嘅一鑊飯

西班牙海鮮飯睇上去好豐富又海鮮又盛咁,最好就係整比男朋友女朋友食順便「裝逼」,等佢覺得您好似好勁咁。(利申:筆者單身。)雖然好似好多嘢咁但整起上嚟都唔算好難。坊間有好多食譜,今次整一個相對簡單啲嘅試下。

同Risotto唔同,筆者覺得成品出到嚟最好係收乾晒所有水份,同埋有少少好似焦嘅感覺係最好。

墨汁西班牙海鮮飯[3-4人份量]:

材料:

  • 西班牙短米———250克
  • 蒜蓉——————2粒(切成蓉)
  • 蔥頭——————1粒(切成蓉)
  • 洋蔥——————1個(半個切粒,半個煮湯)
  • 紅甜椒—————1個(切粒)
  • 茄膏——————0.5茶匙
  • 罐頭蕃茄蓉———半罐
  • 番紅花—————少許
  • 香葉——————2片
  • 煙燻甜椒粉———1茶匙
  • 番茜——————少許(切碎)
  • 檸檬——————1個(切件開6份)
  • 魚湯——————500毫升
  • 白酒——————1杯
  • 水———————100毫升
  • 橄欖油—————適量
  • 鹽———————適量
  • 黑胡椒—————適量
  • 即食墨魚汁———1包

海鮮食材:(可自由配搭其他海鮮)

  • 蝦———————12隻
  • 小青口—————12隻
  • 白身魚塊————2(如比目魚、鱈魚等;切大粒)
  • 魷魚——————1隻(去衣,魷魚身切圈,魷魚腳切段)

步驟:

  1. 先將魚湯、水、洋蔥同埋香葉煮滾備用。
  2. 將海鮮食材分別於加入橄欖油的熱鑊中煎至8成熟,加少少鹽同黑胡椒調味。(蝦同魷魚大約1分鐘;白身魚大約2-3分鐘;青口開蓋就可以。記得食才要印乾咪彈到HiHi。)
  3. 中火加橄欖油,放入蒜蓉、蔥頭同洋葱粒炒至透明,加入紅甜椒同西班牙短米,炒大約3分鐘令米至半透明,加入白酒煮至酒精揮發。
  4. 加入茄膏、蕃茄蓉、番紅花同埋甜椒粉攪勻。再加入即食墨魚汁攪勻煮多2分鐘,將飯鋪平至整個鑊底。
  5. 加入魚湯,用細火慢慢加熱,加鹽同黑胡椒調味,煮大約15-18分鐘。(如果有信心嘅話最好一次過落晒啲湯會好啲,如果唔放心先落8成,唔夠先加。鋪平後不要攪拌啲米,不要攪拌啲米,不要攪拌啲米。但如果倒湯時沖散左啲米,就鋪番平佢喇。但係無人叫你好似瀑布咁倒啲湯入去。)
  6. 繼續細火煮至米飯吸收8成水份,將海鮮食材鋪上飯面,再煮大約8-10分鐘至水份完全收乾熄火,最後加入番茜碎同檸檬件。(如果怕海鮮唔夠熟可以用錫紙蓋住令海鮮熟透。)

小貼士:

  1. 最好用屋企最大果隻平底鑊,我今次用果隻大約係30厘米鑊。(如果要「裝逼」都可以買番隻Paella Pan喇!)
  2. 為咗令邊邊嘅米都唔會生,煮果時最好每3-4分鐘將隻鑊轉轉位偏埋一邊。
  3. 如個有西班牙辣肉腸加埋會再好食啲,但我唔係成日用所以無買。有啲食譜會用中式臘腸但我唔想試。
  4. 即食墨魚汁我係買Muji袋裝一包有兩小包果隻,份量岩岩好又方便。
  5. 如果唔食墨汁,都可以跟番上面個食譜照樣整到。
  6. 無番紅花嘅話,可以用黃薑粉代替。
  7. 呢個版本出度嚟米會有少少「未熟稔晒」,唔習慣嘅話水可以加多10%,同埋煮耐少少。(最緊要不時移動個鑊。)

IMG_1913

廣告

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s